Magduha na ka semana ang milabay sukad mikuyanap ang hungihong nga aduna’y sigbin sa Purok Gumamela.
Nagsugod ang tanan kadtong mitug-an si Nong Piktoy sa iyang mga kainom og tuba. Nakita niya ang mahikanhong mananap duol sa kamotehan usa ka gabii niana nga mipauli siya sa ilang balay. Matod pa niya, nagtuwad-tuwad kini atubangan sa punoan sa saging ug nasug-an gamay sa iyang espat. Kalit kuno kining midagan palayo.
Samtang miangkon ang tiguwang nga hubog siya ug nahibilin iyang antepara atol niining panghitaboa, sigurado kuno siya nga sigbin iyang nakita niadtong gabhiona.
Lahi sab ang gisaysay ni Berta Bungol. Nadunggan kuno niya ang sigbin nga nagbahis-bahis dapit sa ilahang kamotehan mag-alas diyes na sa gabii. Nahitabo kuno kini kadtong gibati siya og sakit sa tiyan og miadto sa kasilyas sa gawas sa ilang panimalay aron maalibyohan ang iyang kahimtang. Wala na niya nakita ang mananap kay asta kunong ngitngita sa palibot.
Midungag sab siya nga dili katuohan ang giingon ni Nong Piktoy. Dili na kuno kini makaila sa kalahian sa nati nga kabaw ug sa tawo nga nagpungko, hilabi na sa layo.
“Nganong motoo man mo ana kay Berta nga bakakon man na siya!” Mao kini ang ingon ni Tata Pahak kadtong siya na pod ang gipangutana kabahin sa sigbin. Matod pa niya nga bisan pa wala niya nakita ug nadunggan ang kahibulongang mananap, nakasimhot kuno siya og baho nga susama sa gikunis-kunis nga batong duol sa kamotehan.
Midungag si Tata nga natingala sab siya nganong wala nahilabtan ang mga kalabasa nga anaa dapit sa kamotehan nga mao man unta kini ang paborito nga simu-simoon sa mga sigbin. Duda niya nga dili lang usa kabuok ang mga mananap kay ubay-ubay sab ka punoan sa kamote ang nangahapla.
Sa pagkakaron, gialirongan na og pisi nga abaka ang dapit kon asa kuno nakita, nadunggan, ug nasimhotan ang maong sigbin. Kon imohang susihon ang maong lugar, makakita ka og natumbang bani sa saging nga napuno og bangag nga daw gilugit sa tag-as nga mga kuko. Gipabutangan sab sa purok lider og mga gipahait nga kawayan ang kalikopan sa maong erya aron sumpa batok sa maong mananap.
Paolo M. Sandalo is an avid fan of music, comics, and video games. He has Taps, Mochi, and Sushi as his inspirations to wake up each day.