Diaspora
Pinaagi sa pulong,
aduna’y suwab nga giduslak
ug minglahos sa’kong gusok. Tungod
gikan sa kulonon
nga lalang sa yuta,
gibunyagan nila akong dila
ug gihimong ulipon
sa mga batadilang
hantod karon
di gihapon nako masabtan.
Pinaagi sa pulong,
inig motikang ko sa lam-aw nga tubig,
mahimo kong selopin nga gi-dala
ug nagkapakapa sa hangin,
saag, galutaw-lutaw
sa wa’y kahumanan, hantod sa midaguos
nalang
ang matag dagayday
sa yamog gikan sa mga dahon
paingon sa’kong panit.
Pinaagi sa pulong,
manindog ang matag balahibo
sa’kong bukton ug paa
samtang ginahapyod akong kamot
sa lumalabayng balud
sa lapyahan.
Ug, sa dayon, kalit nga misilaob
akong kalag
samtang hinay-hinayng
nahugno
ang tore de-gading
mao’y nagbutyag:
kining tanghaga,
dili takos ilitok
sa pulidong pinulongan.
Apan, kon ibukhad ko karon
kining pulong,
o, kining inahan nako nga pulong,
kalit nga tuokon sa hangin
akong baga
ug mahimo kong tilapyang
ga-giok sa lapok,
gapanglimos og hangin,
gahandom
nga mabanlas pabalik
sa tinubdang
hagbay ra kong saag
ug hagbay rang nalimtan.
—
Clint Jovial Delima is currently a second-year BA English (Creative Writing) student studying at the University of the Philippines Mindanao.
Illustration by Noy Narciso