nilingkod mi sa balas sa Kaputian,
sama sa hilom nga bato sa baybayon,
hinay-hinay nga misaka ang adlaw,
gisugdan ang tibuok hapon nga sonata.
hayahay ang tingog sa tapya sa balod,
nindot ang panaghoy sa mga langgam,
nipakpak tanang dahon sa punoang talisay,
misabay sa hoyohoy sa tugnaw nga hangin.
alingogngog nga niagi ang baroto,
misayaw ang kiat nga mga isda,
nitan-aw ang mananagat sa langit,
nipasalamat sa grasya ni Magbabaya.
unta inig balik kauban ang banay,
mao gihapon ang among maabtan,
ang kanindot sa buhi nga kalikopan,
nga dili gyud namo angay kalimtan.
Angelo Lenard E. Yu is a faculty member of the Language and Literature Department, University of Southeastern Philippines, Davao City.
Illustration by Noy Narciso