Kaniadto, pirmi gyod kusniton
ni Nanay akong dunggan kay
disgrasyado kuno ko. Pananglitan,
ang tanke de girang tarak-tarak
sa akong maguwang, natangtangan
og mga ligid samtang ang iyang
power rangers kon dili mawad-an
og mga tiil, maputlan og mga ulo!
Unya ang akong mga baraha
sa Yu-gi-oh, mga lastiko, ug uban
pang mga dulaan sama nila Batman
ug Superman, kon wala nabiyaan
sa eskuylahan, gikawat sa akong
mga silingan? Kinsay nasayod?
Bitaw, adunay mga butang nga
gawas sa atong mahimo kay bisan
nasayod na akong unod sa kahapdos
sa usa ka kusi, bisan nahurot na
akong kusog sa matag ayo sa mga
naguba ug pangita sa mga nawala,
dili masabtan sa akong mga
ginikanan nga ang ilang anak,
bisan disgrasyado, dili usa
ka disgrasya.
Ivan writes from Davao City.