Matag hapon sa bukton mo
ako gapauraray, makatog uban
sa imong taghoy, pikpik, ug mga awit.
Sa puting sandong gatuyok
nga nahimong pamaypay
ako kaamgog pagpahulay,
wa mo damha ang binhud sa braso
ug budlay sa patabyog, basta imong palanggang apo
motubong sakto, himsog, ug puno sa kalipay.
Sa paspas nga dagan sa panahon,
sa mga katuigang milabay,
ni-a na ang bugnawng hangin sa aircon
ug mga nga sonata sa youtube ug spotify.
Apan ang simpleng pagkatog
lisud na kab-uton, ang kahimsog
mahal, ug ang kalipay angay pang pangitaon.
Dili sama kaniadto
nga sa imo lamang lig-ong mga bukton
sa imong mga alawiton, ako
luwas, malipayon, ug busog
sa pagpangga.
Kaniadto nga ikaw
ania pa, kauban pa,
Lola.
—
Si Reymond Pepito usa ka manunulat nga pinangga sa iyang Lola Mina. Gikan sa Lungsod sa Tagum.