Alang Kang C.

Karong hapona, sama sa makadaghang higayon, napakyas na usab ako sa pag-abog
sa adlaw balik ngadtos sidlakan. Wa ko pa mahuman ang buot kong buhaton
nga balak, apan ang kape sa tasa hapit na tawon mahurot, ug ang papel,
napuno na sa kinurisang mga pulong nga di haom sa paghulagway
sa atong mga damgo alang sa kaugmaon sa atong nasud.
Kanus-a pa kaha adunay igong panahon, bisag usa
ra ka gutlo, nga way laing unod kining akong
hunahuna apan ikaw ra, ug sa imong
kasing-kasing, ako ra? Apan kay
kita nakigbisog, ang atong
gugma mosubida sab
sa mga bungtod.
Antos lang.
Hapit
na.

Webmaster’s note: the font size of this piece has been reduced to preserve the visual structure of the poem