Istoryahi Ko

maayo mu istorya si Ma’am uy
purbidang paminaw nako

“the annulment cannot be processed
when the spouse is not in trial
before the court of the land.”

unsa daw to? pastilan jud murag tinuod man
gilansangan ang iyang mga pulong
sa katahum sa iyang power point
de colores kaayo, naa pay gauntol-untol na bata
napuno ug drawing sa mga nindot nga
panang linya
paadto didto
paari diri
simang sa wala
tul-id sa tuo
katoohan jud ay

apan nasipyat si Ma’am
nibaliko ang ininglis
nigahi ang dila
nidukot ang pulong
pastilang lugit ni Ma’am sa nidukot
niyang inglis
simang sa wala
tul-id sa tuo.

“for the instanced example of annulment
the assistant called of the husband
which the wife intercepted and
the assistant hurriedly shut down the phone
and the husband tell the wife
it was just a prank call.”

ingon nako kang Ma’am na
hiwaon ta, Ma’am, paluag-luagan ta ug gamay
ug tuod pa migawas ra jud

“the wife knew the husband told a lie
she knowing the assistant is the mistress
calling her husband
now, in the middle of the noon”

hulat pa daw, Ma’am, kadiyot sa
kuwang pa kaayo ni
lugiton pa nato ni ug ikaduha, Ma’am.

ug redi na si Ma’am
matud niya,

“the private party in married spouse
wants the change in law to enter the rule.”

lisod ni da. unsa kaha ni?
lalum ni na ininglis, Ma’am.
murag dili na nako ni carry

naunsa man si Ma’am uy
nidulom ra ang langit
niuwan ra ug kusog
nikilat ra ug kadiyot
nandukot na ang bugnaw niyang pulong.

ug ang power point?
wala jud natarog
sige lang gihapon ang pagpakita
sa mga decolores na bulak
ug gauntol-untol na bata.

—
Si Riza Racho-Baldovino usa ka abogado nga nagatudlog Pamalaod sa Ateneo de Davao University.