Miabot ang grupo didto sa usa ka abandonadong bilyaran sa Jacinto. Mao kadto’y giila nilang hideout. Sa dihang nakasulod na tanang Spiders, mipaduol si Stella sa bilyaran. Pagsilip niya sa gamay nga bangag, nakita niya nga nanaka ang mga lalaki sa second floor. Sa kagustuhan ni Stella nga makahibalo, misulod siya ug gibilin iyang bag sa usa ka lamesa sa silong. Mikamang siya pasaka ug gisilip ang gihimo sa mga Spiders. Nakita niya ang iyang kuya Lucas nga dunay taptap sa mga mata ug nakaluhod samtang nagpalibot kaniya ang ubang myembro. Sa atubangan ni Lucas nagtindog si Louie ug dunay mga gipangyawyaw. Nakadungog si Stella sa mga pulong apan wala na niya gipaminaw. Ang iyang tuyo mao ang masayran kung unsaon ang iyang kuya.
Taud-taud, gitunol ni Ben kang Louie ang usa ka injection nga puno og berde nga likidong. Gituruk ang maong droga kang Lucas. Mipiyong lang ang mata ni Lucas samtang ginapaak ang iyang ngabil. Gikuha dayon ni Louie ang usa ka baseball bat. Gihalok-halokan kini ni Louie, dayon gimandoan si Lucas nga motindog.
Mitindog si Lucas. Sa wala madugay gibunal ni Louie ang maong bat sa paa ni Lucas. Gibunal niya ang bat nga murag namunal og punoan sa kahoy. Dili lang kausa. Kaduha. Katulo. Sa paa. Sa hawak. Sa lubot.
“Aaaaaahhh….aaahh! Agaaayy!” Mao lamang kini ang nasiyagit ni Lucas samtang natumba kini sa salog.
“Kuya Lucas! Kuyaaa!” Wala makapugong si Stella. Sa iyang kakurat, nakasiyagit siya.
Nabungkag ang pundok sa mga batan-ong lalaki ug ilang gikuha si Stella. Naghilak ang dalagita kay ginapuga man sab ang iyang bukton. Naghilak sab siya kay naluoy sa iyang kuya.
“Stella! Nga..nong naa man ka.. diri? Pauli na!” Giduol ni Lucas ang iyang manghud bisag nagtakiang kini.
Miduol lang og kalit si Louie. “Unsa man ni bay? Nganong nakabalo man na imong manghud, ha? Dili magsilbi na dinhii sa Spiders. Kinahanglan na siya silotan!”
“Ha? A..ambot nganong nakahibalo na siya nga naa ta dinhi. Basig gisundan ta niya. Nganong naa man ka diri, Stella ha?”
“Kay naguol man ko sa imo kuya. Ha..hadlok ko ma..maunsa ka… Nganong nag-apil man ka..a..ani nga mga ga..gago man ni sila?”
“Ayay! Mga gago daw ta parts. Ayay!,” Mipalag ang mga lalaki.
“Wala ka kasabot nganong miapil ko. Ayaw nag labot-labot bi! Puta!”
Natingala kaayo si Stella nganong ingon ato ang pagtratar sa iyang kuya kaniya. Nakahilak na lang siya. Dayon, miduol si Louie kang Stella ug gisinyasan ang ubang mga naggunit kang Stella nga ipahigda kini sa salog. Duha ka lalaki ang naggunit kang Stella sa kamot, ug duha sab sa tiil. Nakamatikod na si Lucas kung unsay himuon ngadto sa iyang manghud. Apan huyang siya ug mas nagpatigbabaw ang gahom sa droga.
“Puslan man nga nakasala ka, atong gamiton na imong pagkasexy ug imong pagkagwapa. Sayang lang nang imong hamis nga panit. Hehehe…”Mao kini ang bahad ni Louie kang Stella.
Grabe na ang hilak ni Stella samtang gapaningkamot kini nga makaikyas gikan sa mga gang members. Nagsagol na ang mga bahakhak sa katawa ug ang danguyngoy sa hilak sa usa ka dalagita. Gitanggal ni Louie ang sapatos ni Stella ug gibuklad ang palda sa dalagita samtang gipagawas niya ang iyang dila ug gipatulo ang iyang laway. Alang kang Stella, animal kaayo si Louie.
Gipabilangkad pa gyud pagtaman ang dalagita ayha pa gihubo ni Louie ang panty ni Stella gamit ang iyang ngipon. Grabe ang kasadya sa mga lalaki. Samtang si Lucas, nakaantigo lang sa pagtan-aw sa pagbusabos sa iyang manghud.
Human og hubo sa panty sa dalagita, gipamaskara kini sa iya. Nangatawa silang tanan. Apil na si Lucas. Mas labaw pa gyud silang nangatawa kadtong nakita ang nalata nga panwhich sa bulsa ni Stella. Ang panwich nga iya untang ihatag sa iyang kuya Lucas, nga karon apil sa mga lalaking nagkatawa nga nagtan-aw sa iyang kahimtang. Ang gibuhat ni Louie, gipahid-pahid ang panwich sa kinatawo ni Stella, gisuksok sa sulod, gikulitog, dayon gikaon kini.
Gitanggal sad ang blouse ug bra sa dalagita. Ang nabilin nalang mao ang iyang nakasaka nga palda ug ang mga medyas sa iyang tiil. Ug nihilom kadiyot. Naghubo kalit si Louie ug gihap-an ang nakagapos nga lawas sa usa ka batan-ong babaye. Sugod sa ulo paubos. Paubos. Gibaboy. Gibusabos. Gilugos.
“Aah..ahh…aaaaahhhhhhh……mgaaaa haaayyooppp!!!” Wala na’y kusog si Stella nga mosiyagit pa. Huyang na siya.
Minaog na lang si Lucas ug nigawas gikan didto sa hideout. Ngitngit na ang palibot. Pula kaayo iyang nawong ug luya sab siya. Wala siya’y nahimo alang sa iyang manghud nga nagpalangga sa iya. Mipalit siya og sigarilyo sa duol nga tindahan samtang ginapistahan pa sa ubang mga lalaki ang iyang manghud. Gipuli-pulihan. Giabusar pagtaman.
Taud-taud dunay motorsiklo nga mihunong sa gawas sa ilang hideout. Duna kini’y sakay nga tulo ka nakabonet nga lalaki ug ang duha ka sakay niini diretso nga misulod sa bilyaran. Nakamatngon na lamang siya sa dihang nakadungog siya og upat ka buto sa pusil. Dayon, nakita niya ang ubang mga myembro sa gang nga nanagan. Sa wala madugay, may miabot nga Police Car ug gigukod ang mga myembro sa gang. Ang uban, nadakpan. Sa iyang kahadlok, midagan sad siya og apil samtang dunay lima ka pulis nga nagagukod kanila.
Nakasabay ni Lucas si Ben ug miingon kini, “Dagan! Dagan! Ayaw sa mog lingi-lingi. Magbulag-bulag ta!”
Pagtipas nila sa kanto, sa banda sa Freedom Park, nakakita si Lucas og pundok sa mga raliyista nga nag-candle lighting. Nakahuna-huna kini nga moadto didto ug mag-atik-atik nga apil sa rally aron dili siya dakpon sa mga pulis. Nagpasalipod siya sa mga estudyanteng aktibista ug nagpakaaron-ingnong kauban sab siya sa rally. Nakita niya ang ubang miyembro sa Spiders gang nga gipangdakop. Ang uban tingali, mao kadtong gipusil sa sulod sa bilyaran.
Kalit lang misinggit ang lider sa rally.
“Hustisya alang sa mga biktima sa pulitikanhong pagpamatay!”
“Hustisya! Hustisya!” Sabay-sabay nga nanubag ang mga raliyista samtang nakataas-kamao. Paglingi ni Lucas sa unahan, nakita niya si Ben nga nadakpan sa mga pulis, ug ginatudlo siya. Aron ingnong aktibista pud, misabay-sabay sab si Lucas sa pagtaas sa iyang kinumo ug sa pagsinggit og “hustisya.”
“Hustisya alang sa mga biktima sa tanang pagpang-abuso!”
“Hustisya! Hustisya!”
Sa wala madugay, nahuman na ang rally. Nanghawa na ang mga aktibista. Mihawa na sad si Lucas. Hinay-hinay siyang naglakaw samtang namalandong sa kahulugan sa pulong nga iyang gisinggit-singgit bag-ohay lang —ang pulong nga “hustisya.”
“Si Stella! Tama, ang akong manghud.”
Midagan si Lucas sa direksyon sa Jacinto aron balikan ang iyang manghud. Apan naglisod siya sa pagdagan kay sakit man ang iyang lawas ug bug-at sab ang iyang kasingkasing.
—-
This story won for Paul Randy gumanao the Second Place in the Saturnino Apoyon Tigi sa Mubong Sugilanong Binisaya (formerly known as the NCCA-DWG Fiction Writing in Bisaya Contest).
One thought on “Sa Kalsada, Part 2”